celuy à qui elle deuoit plus que la vie, puis qu’elle luy deuoit vne partie de ſa Vertu. Comme cette action fut d’un grans eſclat, elle aquit tant de gloire à cette ſage fille qu’il n’y auoit perſonne à Metapont qui ne la reueraſt. Si bien que ſon amitié fut tres vtile à Licinius & à Tarquinie. Elle fit meſme que Brutus ne fut pas eſleué comme les autres Enfans, & qu’on ne luy aprit iamais rien que par raiſon, & non pas ſeulement par vn ſimple effort de mémoire, comme la plus part des Maiſtres aprennent à ceux qu’on remet ſous leur conduite. De plus, quoy qu’elle fuſt fille d’un Pere dont la Philoſophie auoit de l’auſterité, & qu’il euſt meſme obligé les femmes de Metapont à donner volontairement vne partie des choſes qui ſeruoient à les parer, pour baſtir vn Temple à Iunon, elle diſoit pour-
