tant qu’il falloit donner vne honneſte liberté à tous ceux qui commencent de viure, & que la Vertu deuoit auoir vne eſpece de ieuneſſe, ſi l’on peut parler ainſi, pendant laquelle les Feſtes, les ieux, & les plaiſirs innocens fuſſent permis, de peur que l’ame ne ſe rebutaſt d’abord de toutes les difficultez de l’eſtude, & ne ſe trouuaſt accablée de ce qui la deuoit rendre capable de ne le pouuoir iamais eſtre par la mauuaiſe fortune. De grace (diſoit-elle vn iour à Tarquinie, comme ie l’ay ſceu depuis) ſi vous auez deſſein d’eſleuer voſtre fils à de grandes choſes, commencez de bonne heure à luy inſpirer l’amour de la gloire, & taſchez à faire qu’il la prefere touſiours à tout. Mais, luy diſoit Tarquinie, le moyen en l’âge où eſt mon fils que ie puiſſe luy inſpirer des deſirs de gloire, puis qu’à peine commence-t-il d’auoir de la
