eſtoit auſſi obligeante que belle, elle la viendroit voir auſſi toſt apres diſner. De ſorte que Chryſis qui auoit pour Bellanire toute l’ardeur d’une nouuelle amitié, fut chez elle de fort bonne heure. Mais à peine y fut-elle arriuée, que Bellanire apres les premiers complimens, luy dit qu’enfin ce nouuel Amy de Damo qui deuoit eſtre ſon Amant, eſtoit à Crotone, & qu’il viendroit ce iour-là chez elle, auec cette admirable Fille qui luy en auoit donné la connoiſſance. Mais de grace, luy dit-elle en riant, ne m’allez pas dementir, montrez auiourd’huy tout voſtre eſprit ; & conſultez meſme mon Miroir pour racommoder voſtre coiffure, afin que voſtre beauté ait tout ſon eſclat. Ha ! Bellanire, lui dit-elle, dés qu’on veut auoir de l’eſprit on le perd, & ie n’en ay iamais quand i’y penſe. Mais encore, adiouſta-t-elle, que trouuez vous
