luy, où elle n’eſtoit point entrée depuis la mort de la genereuſe Tanaquil, & de la Princeſſe d’Ameriole : mais qu’apres tout elle eſtoit preſte d’obeïr. En effet, ſuiuie de pluſieurs de ſes Eſclaues, elle fut trouuer Tarquin, qui ne la vit pas pluſtoſt, qu’il luy demanda ſi c’eſtoit Herminius ou Aronce qui auoit eſté caché chez elle. Seigneur, repliqua ſiualia ſans s’emouuoir, ſi i’eſtois connuë de vous pour ce que ie ſuis, il vous ſerais aiſé de comprendre ce que ie vay vous dire, c’eſt que ie ne vous diray rien qui vous eſclairciſſe de ce que vous voulez ſçauoir : car ſi Aronce ny mon fils n’ont pas eſté chez moy, ie dois vous dire que ie ne les ay pas veus : & ſi effectiuement vn des deux y a paſſé, ie dois encore plus fortement vous aſſurer qu’on vous a donné de faux aduis : car il y a des occaſions où la verité eſt criminelle.
