Ainſi il vous euſt eſté aiſé de vous eſpargner la peine de voir la veuue d’un homme de grande Vertu que vous n’aimiez pas, & la Mere d’un autre que vous haïſſez, quoy que tout le monde m’aſſure qu’il a toutes les qualitez qui peuuent faire aimer vn homme d’honneur. Il ne s’agit de ſçauoir ſi i’ay raiſon, ou ſi i’ay tort de haïr Herminius, reprit bruſquement Tarquin, car ie n’ay iamais guere examiné cela durant toutes ma vie, parce que i’ay preſupoſé que ceux qui ont la ſouueraine puiſſance, ont touſiours raiſon de faire leur volonté. Mais il s’agit de dire poſitiuement en quel lieu eſt à cette heure celuy qui a eſté caché chez vous, & que vous auez fait cacher ailleurs. Non, non, Seigneur, reprit Siuelia, on ne me fera pas dire ce que ie ne ſçay pas, ou ce que ie ne veux point re-
