Tarquin, vous a mis où vous eſtes, & m’a mis où ie ſuis, c’eſt pourquoy tenons nous à la place où nous ſommes, & ſoyez fortement perſuadée que ie feray touſiours tout ce que ie deuray faire pour bien vſer de l’authorité que vous dites que vous m’auez donnée. Comme Tullie alloit reſpondre, & reſpondre fierement, Amilcar qui s’eſtoit fait enuoyer à Rome par le Prince Sextus, afin de pouuoir voir Aronce, & de taſcher de faire retourner Tarquin au Camp pour l’empeſcher de voir Clelie, fit dire qu’il demandoit à parler au Roy. Tarquin qui eſtoit bien aiſe que ſa conuerſation auec Tullie fuſt interrompuë, commanda qu’il entraſt. De ſorte que cette fiere Princeſſe ne ſe ſouciant pas alors de ſçauoir des nouuelles du Siege d’Ardée, ſe retira en murmurant. Mais à peine Amilcar parut il, que Tarquin apres l’auoir
