auſſi bien receu que le chagrin qu’il auoit dans l’ame le luy pouuoit permettre, luy demanda la cauſe de ſon voyage. Seigneur, luy dit-il, le Prince Sextus connoiſſant le zele que i’ay pour voſtre ſeruice, a voulu que ie vinſſe vous repreſenter combien il importe que vous reueniez promptement au Camp : car enfin depuis que les Ennemis ont ſceu par quelques Eſpions, que vous n’y eſtiez pas, ils en ſont deuenus plus vaillans, & ne font plus autre choſe que faire des ſorties continuelles. Il s’eſt meſme eſpandu vn certain bruit dans voſtre armée qui oſte le cœur à vos Soldats : car on dit que vous voulez leuer le Siege, & que vous ne retournerez pas au Camp : c’eſt pourquoy ie viens vous coniurer de la part de tous vos Capitaines de vouloir reuenir le pluſtoſt que vous pourrez. Le Prince Sextus luy meſme, adiouſta-t-il auec
