ronce, & de Clelie, comme s’il euſt voulu eſtre le Mediateur entre Porſenna & eux, & qu’il euſt changé de ſentimens pour Clelius, quoy que ce ne fuſt en effet que pour obliger Amilcar à dire ce qu’il en ſçauoit. Mais comme il eſtoit fidelle à ſon Amy, & auſſi adroit que Tarquin penſoit l’eſtre, il ne luy dit rien qui pûſt nuire à Aronce, ny à Clelie, bien que ce fuſt la plus difficile choſe du monde à faire, car il falloit ne flatter pas trop l’amour de Tarquin, il ne falloit pas auſſi irriter ſa haine : & il y auoit vn certain temperament à garder, que le ſeul Amilcar eſtoit capable de trouuer. Mais enfin apres vne aſſez longue conuerſation qui n’aboutit à rien, Amilcar ſe retira. Il ne pût pourtant ce ſoir là auoir des nouuelles d’Aronce, parce qu’il eſtoit trop tard : & ſçachant meſme le lendemain au matin ce qui s’e-
