ſtoit paſſé chez Siuelia, il n’oſay aller de iour : mais dès que le ſoir fut venu, il vit cette Vertueuſe Perſonne de qui il receut toutes les ciuilitez qu’en pouruoit attendre vn Amy d’Aronce, & d’Herminius : de ſorte qu’apres les premiers complimens, & apres auoir raiſonné ſur l’eſtat des choſes, elle luy dit qu’elle l’alloit faire conduire au lieu où eſtoit Aronce. Mais genereuſe Siuelia (luy dit Amilcar, lors qu’il ſceut chez qui Aronce eſtoit) Brutus ne demeure-t-il pas auec ſa Tante ? ouy, reprit cette ſage Perſonne en ſouriant, mais n’en ſoyez pas en peine. Ie ſçay bien, repliqua Amilcar, que ce n’eſt pas vn homme capable de penetrer dans nos deſſeins, mais ſi ſa ſtupidité m’aſſure d’un coſté, elle me fait peur de l’autre. En effet, pouſuiuit-il, qui vous a dit que cét homme qui paroiſt auoir ſi peu de lumiere, & que tout le monde
