ment quelque grand témoignage d’amour que quelque Amant a rendu à ſa Maiſtreſſe. Iugez donc ce que ie dois faire quand i’aprens qu’un Riual, & vn Riual qui a mille bonnes qualitez, vient d’expoſer ſa vie pour le ſalut de la perſonne que i’aime ; & qu’elle l’a veû combatre de ſes propres yeux ; puis qu’eſtant auſſi genereuſe qu’elle eſt, il eſt impoſſible qu’elle n’en ait point de reconnoiſſance, quand elle ſçaura que c’eſt Maharbal qu’elle a veû combatre. Ha Seigneur, repliqua Amilcar, la choſe n’eſt pas ainſi : car i’ay veû Clelie, ie luy ay dit le nom de celuy qu’elle a veû ſe deffendre ſi courageuſement : mais bien loin de luy en ſçauoir gré, elle croit qu’en voulant l’oſter de la puiſſance de Tarquin, il auoit les meſmes ſentimens qu’autrefois lors qu’il la vouloit tirer de celle d’Horace, quand il le combatit ſur le Lac de
