trop bien de demeurer en ce lieu-là ; ſi bien qu’il leur propoſa de partir aueque luy à l’entrée de la nuit ; les aſſurant qu’il les meneroit dans vne Maiſon de Collatie, où ils ſeroient mieux cachez. Mais, reprit Herminius, vous ne ſongez pas que Collatin eſt Maiſtre de Collatie ; pardonnez moy, reprit-il, mais ie ſçay que Colatin eſt au Camp, & qu’il ne va preſentement guere voir Lucrece : & puis la Maiſon de celuy chez qui ie vous veux mener eſt vne Maiſon eſcartée : de plus c’eſt vn homme qui n’a femme, ni enfans, qui dépend de moy, & qui eſt fidelle. Apres cela perſonne ne reſiſta à Brutus ; & Valerius qui eſtoit preſent, eſtant de ſon auis, ils partirent le ſoir enſemble, & Brutus fut mener ſes Amis chez ce meſme homme où il auoit eſté loger, lors qu’il auoit veû Lucrece dans ce Iardin, où il luy auoit
