Zenocrate, & Celere, n’eſtoient pas accuſez. Cependant le Prince de Pometie qui aimoit tendrement Hermilie, eut vn ſoin particulier de s’informer de l’embrazement de la Maiſon de Racilia, afin de ſçauoir ce qu’eſtoit deuenuë cette belle fille. Il eſt vray que Brutus reſpondit ſi peu preciſément à ce qu’on luy demandoit, que ce Prince n’en fut guere plus ſatiſfait : auſſi Brutus n’eſtoit-il en ce lieu-là que pour eſcouter ce qu’on y diſoit. Il ſçeut donc que la negociation d’Ardée eſtoit touſiours en meſme eſtat, & qu’on n’en eſperoit plus guere ; Tarquin voulant bien rendre les Captiues, à la reſerue de Clelie ; mais ne voulant point entendre parler de celle-là. Mais Horace qui auoit aquis beaucoup de credit dans Ardée, faiſoit que ceux de cette Ville-là s’opiniaſtroient à vouloir auoir Clelie, auſſi bien que Ceſonie,
