Plotine, Danaé, & leurs Amies. L’Enuoyé du Roy de Cluſium ſe pleignoit fort auſſi de ce qu’on n’auoit nulle nouuelle d’Aronce, & ſolicitoit puiſſamment pour empeſcher qu’on ne remiſt Clelie entre les mains de ceux d’Ardée. Mais il n’auoit que faire de le craindre, car la paſſion de Tarquin l’en empeſchoit aſſez. Les choſes eſtant en ces termes, Tullie & Lucretius ſeparément, enuoyerent à Tarquin, & ceux qui furent enuoyez de leur part, arriuerent dans ſa Tente comme Brutus y eſtoit, ſans que ce Tiran y priſt garde. Brutus eſcoutant donc ce qu’on diſoit à Tarquin, ſans que perſonne le fiſt retirer, il oüit que l’Enuoyé de Tullie, luy diſoit qu’elle auoit enfin ſçeu qu’Herminius auoit eſté caché à Rome ; que c’eſtoit luy que le Capitaine de ſes Gardes auoit voulu arreſter ; qu’Aronce auec trois de
