cela (pourſuiuit-elle les larmes aux yeux) ne m’en demandez pas dauantage ; mais promettez moy genereuſement que vous me vangerez ; que vous exterminerez toute la Famille des Tarquins ; que vous mourrez plûtoſt que de leur laiſſer la vie, & qu’enfin perſonne ne pourra iamais à l’auenir apprendre l’outrage que i’ay reçeu, ſans en apprendre la vangeance. En acheuant ces paroles, Lucrece ſans en auoir ſans doute le deſſein, rencontra encore vne fois les yeux de Brutus ; il eſt vray qu’elle deſtourna auſſi toſt les ſiens : mais ce ne fut pourtant qu’apres qu’il y eut veû des mouuemens qui ſembloient luy demander en particulier qu’il la vangeaſt de Sextus. Alors ſon Mary s’auançant vers elle, ſe mit à la conſoler, & à luy promettre de la vanger, pendant qu’une fidelle Eſclaue de cette belle affligée, racon-
