toit en deux mots à Lucretius le crime de Sextus, & cette terrible auanture que toute la Terre a ſçeuë ; apres quoy Lucretius, auſſi bien que Collatin & Valerius, promirent à Lucrece de la vanger hautement. Pour Brutus, il ne le luy promit que par ſes regards, & par certaines actions menaçantes qu’il ne pût s’empeſcher de faire : car quand il euſt voulu parler, il ne luy euſt pas eſté poſſible dans ce premier inſtant ; tant la douleur, la rage, la colere, l’amour, & la ialouſie agitoient ſon eſprit. Mais apres que ces quatre Romains eurent promis à Lucrece de la vanger, Valerius qui l’aimoit cherement pour ſa Vertu, & qui l’aimoit encore comme vne ancienne Amie de ſon illuſtre fille, luy dit qu’il ne falloit pas qu’elle s’affligeaſt tant, & qu’il falloit qu’elle veſcuſt pour iouïr du plaiſir
