auoit fait baſtir pour s’aquitter d’un vœu qu’il auoit fait pendant la guerre des Sabins. Apres quoy Brutus deſcendant de cheual, fut ſe mettre à vn lieu releué de deux Marches, où comme Tribun des Celeres qu’il eſtoit alors, il auoit droit de parler en public en diuerſes occaſions. D’abord comme il eſtoit accouſtumé de faire ſçauoir les volontez de Tarquin auec beaucoup de ſimplicité à ceux qui eſtoient ſous ſa charge, perſonne ne ſe mettoit preſque en deuoir de l’eſcouter, & tout le monde ſe preſſoit ſeulement à vouloir s’aprocher du chariot de Lucrece, & à demander les particularitez de ſa mort. Mais Amilcar eſtant arriué, ſuiuy de grand nombre d’Amis de Valerius, d’Herminius, & de Collatin ; & ceux qui auoient deſia entendu parler Brutus à Collatie, s’eſtant empreſſez à impoſer ſilence à tout le reſte de cette multitude,
