les Dieux faiſoient vn miracle ; que ce grand eſprit qu’il auoit, luy eſtoit venu tout d’un coup ; qu’il deuoit le regarder comme vn enuoyé du Ciel ; l’eſcouter auec reſpect ; & luy obeïr : tant il eſt aiſé de ſe rendre Maiſtre de l’eſprit du Peuple par les choſes qui le ſurprennent, quand on ſçait s’en ſeruir à propos. Ainſi apres vn grand murmure d’acclamation, tout le monde s’entrediſant en tumulte qu’il ſe falloit taire, cette multitude de teut, & garda vn ſi profond ſilence, que Brutus tirant vn heureux preſage de l’attention qu’on luy preſtoit ; continua de parler en ces termes.
Ie vous ay deſia dit, genereux Romains, que c’eſt auiourd’huy le iour deſtiné à voſtre liberté, & ie vous le redis encore vne fois. En effet c’eſt veritablement auiourd’huy que vous allez recouurer voſtre iuſte authorité, puis
