De delà la Volga, habitent les Tartares, qui se nomment Nagaye. Outre ce, il y a vne autre grande prouince, subiuguée par Iohannes Basilius, laquelle ils appellent l’Empire ou Royaume de Siberie. Le païs est plein de bois, forests, et marescages. Il n’est encores du tout découuert : l’on tient qu’il se ioint d’vn costé sur la grande riuiere de Obo. De ce païs vient presque toute la Pelleterie ; comme Renards noirs, lesquels sont au païs mesme d’vne grande valeur : Sabouline et Martres, lesquelles apportent de grands reuenus aux Empereurs. L’on commence à cultiuer ledit païs, qui se trouue assez fertile quand aux grains. L’on y a basty quatre villes, ausquelles il y a quelques garnisons, pour tenir le peuple en subiection, lequel est fort simple, de petite stature, en phisionomie, approchant des Tartares, dits Nagaye : à sçauoir de visage plat et large, le nez enfoncé, petits yeux, et fort bazannez, ils portent les cheueux longs, peu d’entr’eux ayans barbe, habillez de Sabolline, le poil en dehors, il y a trente ans qu’ils ne sçauoient que c’estoit de pain : Ce païs est le lieu principal, où l’on enuoye en exil la pluspart de ceux qui sont en disgrace du Prince ?
Du costé de la Tartarie, de ceux qu’ils appellent Krim, lesquels sont alliez auec le Turc, à l’aide duquel ils ont esté plusieurs fois en Hongrie, principalement en l’an 95. en cette grande bataille de Agria, depuis l’année 1593. iusques à present, il s’est basty plusieurs Villes et Chasteaux aux campagnes de Tartarie, pour empescher l’incursion des Tartares : mais ce
