l’Empereur consiste la pluspart en viures, asçauoir Grains, Eau de vie, Miel, Venaison, Chairs, Volaille, Fruittage, et toute autre chose necessaire à la cuisine et sommellerie : toute chose nonobstant ce, est particulierement taxée à plus haut prix, et de ceux qui sont vn peu esloignez de la ville l’on prend le tout en argent, mesmes il s’en trouue plusieurs qui sont taxez en argent, à sçauoir chacun Voit qui contient sept ou huict decetins de terre labourée selon les lieux ausquels ils sont, un Decetin est vne piece de terre, sur laquelle on peut semer deux Shetuert de grain, qui est comme si on disoit vn arpent de terre, et payent de cela annuellement dix, douze, quinze Roubles, voire iusques à vingt Roubles selon la fertilité de la terre, chaque Rouble faict enuiron six liures douze sols, qui montent tous les ans à vne grande somme, tellement qu’il se trouue de deniers clairs en cet Office iusques à cent vingt mil, voire iusques à cent cinquante mille Roubles tous les ans, selon les frais et despens des Ambassadeurs estrangers et autres extraordinaires qui sortent de cet Office, il s’est trouué en outre des deniers clairs en quelques vns de ces cinq Setuarts, comme celuy de Casan, et Noua Setuart apres tous frais faicts (car ce sont les lieux desquels toutes pensions et gages de la pluspart des gens de guerre sont payez) iusques à quatre-vingts ou cent mille Roubles, et les autres de quarente iusques à soixante mille Roubles, outre le Bolshoi prichod, lequel outre l’extraordinaire que l’on leue par tout le pays par le commandement de l’Empereur à la ville