bre, principalement de Perles, car il s’en porte plus en Russie, qu’en tout le reste de l’Europe. I’ay veu au tresor pour le moins 50. Robes des Empereurs de rechange, à l’entour desquelles estoient des ioyaux au lieu de passement, et les Robes tout entierement bordées de Perles, et autres bordées tout à l’entour d’vn pied, d’vn demy-pied, de quatre doigts de Perles. I’ay veu demy douzaines de Couuertures de lict toutes bordées de Perles, et diuerses autres choses. Il y a aussi de riches ioyaux, car ils en acheptent tous les ans, lesquels demeurent au Tresor, outre ceux qu’il reçoit des Ambassadeurs. Il y a quatre Couronnes, à sçauoir, trois d’Empereur, et la quatriesme est celle dont iadis les grands Ducs estoient couronnez, sans celle que Demetrius fit faire pour l’Imperatrice sa femme, laquelle n’estoit encore paracheuée, car ce n’est pas la façon du pays de couronner les femmes d’Empereurs ny grands Ducs, Demetrius a esté le premier, il y a deux Sceptres et deux Pommes d’or pour le moings, lesquels i’ay veu, ayant eu l’honneur par plusieurs fois d’accompagner Demetrius Iohannes aux voûtes dans lesquelles est le Tresor. Or ils disent et tiennent que tout est deppendant du Tresor, soit habits, ioyaux, estoffes ou argent : outre il y a deux cornes de Licorne toutes entieres, et vne Crosse, qui est celle que les Empereurs portent, faite d’vne piece entiere d’vne Licorne, c’est à dire la longueur, car ce qui trauerse le dessus surquoy on s’appuye est d’vne contrepiece de Licorne : puis il y a vne autre demye Licorne, de laquelle on vse iournellement aux medecines : I’y ay encor
