veu vne autre crosse d’or, mais vn peu creuse par dedans à cause de la pesanteur : il y a grand nombre de plats d’or grands et petits, et tasses à boire : outre ce vn nombre infiny de vaisselle d’argent dorée et non dorée, comme l’on pourra iuger par ce discours : qu’apres l’élection de Boris Federuits, lors qu’il fit assembler l’armée à Serpo, comme auons touché cy-deuant, il fit festin par l’espace de six semaines presque iournellement à dix mil hommes chacune fois, lesquels estoient tous traitez en vaisselle d’argent, selon le dire de ceux qui y estoient, et tous sous pauillons. I’y ay veu vne demy douzaine de tonneaux faits d’argent, lesquels Iohannes Basilius fit faire de la vaisselle d’argent, qu’il trouua en Liuonye lors qu’il la conquist : l’vn desdits tonneaux presque de la grandeur d’vn demy muid, et d’autres de moindre grandeur : vn grand nombre de bassins d’argent fort grands et creux, auec vne boucle de chaque costé pour les porter, lesquels quatre hommes apportent coustumierement sur chaque table pleins de Medon, et selon la longueur d’icelles tables trois ou quatre bassins plus ou moins, et auec vn chacun de grandes tasses d’argent pour puiser dans iceux bassins, car deux ou trois cens hommes ne fourniroient pas à verser à boire aux conuiez du festin : toutes lesdites vaisselles sont ouurages de Russie : outre icelles il y a vn grand nombre de vaisselle d’argent d’Allemagne, d’Angleterre, de Pologne, qui sont, ou presens de Princes enuoyez par Ambassadeurs, ou qui ont esté achetez pour la rareté de l’ouurage : puis il y a en ce Tresor