et des terres par mesme moyen iusques à trois, quatre ou cinq cens Setuarts : chaque Setuart est comme vn arpent de terre, et se doibt ainsi entendre en tout ce discours : la pluspart des Centeniers ont des terres, et ont de douze iusques à vingt Roubles, les Caporaux iusques à dix Roubles, et les Strelits quatre et cinq Roubles par an : ils ont en outre chacun douze Setuarts de seigle et autant d’auoyne tous les ans : quand l’Empereur va aux champs, combien que ce ne soit qu’à six ou sept virst de la ville, la pluspart d’iceux vont auec luy, et ont cheuaux hors des escuries de l’Empereur : si on les enuoye en quelque part en l’armée ou en garnison, l’on leur donne des cheuaux ; il y a gens ordonnez à les nourrir : chaque dizaine a vn chariot pour mener leurs prouisions, outre ceux qui font residence en Mosco cy-deuant nommez, l’on choisit des principaux Gentilshommes de chaque ville, sous lesquelles ils ont leurs terres, lesquels ils appellent Vuibourne Deuorens de quelque ville selon la grandeur d’icelle, seize, dix-huict iusques à vingt, voire iusques à trente, lesquels resident dans la ville de Mosco l’espace de trois ans : puis d’autres choisis, et ceux-là licentiez, qui faict qu’il y a tousiours vn nombre de cauallerie ; tellement que les Empereurs ne sortent gueres souuent qu’ils n’ayent dix-huict et vingt mille cheuaux auec eux, car tous ceux qui deppendent de la Cour montent à cheual : la pluspart d’iceux couchent par ordre toutes les nuicts au Château sans aucunes armes s’il est question de receuoir quelque Ambassadeur selon que le Prince luy veut
