péché. Au demorant, je la traicte comme moy mesmes, sinon qu’elle va tondue, car l’arraiement des cheveulx n’appartient à l’adultère, ny le voyle à l’impudicque, par quoy s’en va rasée, monstrant qu’elle a perdu l’honneur de la virginité & pudicité. S’il vous plaist de prendre la peyne de la veoir, je vous y méneray. »
Ce que feyt voluntiers Bernaige, lesquelz descendirent à bas & trouvèrent qu’elle estoyt en une très belle chambre assise toute seule devant ung feu. Le Gentil homme tira ung rideau qui estoyt devant une grande armoyre, où il veid penduz tous les oz d’un homme mort. Bernaige avoyt grande envye de parler à la Dame, mais de paour du mary il n’osa. Le Gentil homme, quis’en apperçeut, luy dist : « S’il vous plaist luy dire quelque chose, vous verrez quelle grace & parolle elle a. »
Bernaige luy dist à l’heure : « Ma Dame, vostre patience est égalle au torment. Je vous tiens la plus malheureuse femme du monde. »
La Dame, ayant la larme à l’œil, avecq une grace tant humble qu’il n’estoyt possible de plus luy dist :
« Monsieur, je confesse ma faulte estre si grande que tous les maulx que le Seigneur de céans, lequel je ne suis digne de nommer mon mary, me sçauroit faire, ne me sont riens au pris du regret que j’ay de l’avoir offensé. »
