Le texte de cette page a été corrigé et est conforme au fac-similé.
43
ET DES MARIÉES
La Première Femme.
Celluy qui au Ciel faict séjour
Et en Terre ha l’auctorité.
Vous doint toute prospérité.
La Vieille.
Mes filles, luy, qui ha puissance,
Donne à voz cueurs la congnoissance
De luy, & de vous mesme aussi.
Qui vous amène en ce lieu cy ?
Je vous requiers ne le celler.
La Seconde Femme.
Desir de vous ouyr parler
Et de vous quelque bien apprandre.
Et aussi pour vous faire entendre
Quelque débat en quoy nous sommes.
La Vieille.
Hélas, j’ay des ans si grans sommes
Que je croy que mon vieil langaige
N’est plus maintenant en usaige
Et qu’à peine l’entendrez vous.
La Première Fille.
Ne prenez, Madame, de nous
Ennuy à noz débatz ouyr.
La Seconde Fille.
Nous espérons nous resjouyr
Par vostre très saincte parole.
