Le texte de cette page a été corrigé et est conforme au fac-similé.
73
L’INQUISITEUR
Le Varlet.
Pour ce que je veoy là ensemble
Des enfans jouer au pallet.
L’Inquisiteur.
Voilà la raison d’un follet,
Quant l’enfant joue par nature
A la neige ou du chastellet,
Dire qu’il n’a poinct de froidure.
Le Varlet.
Mon Maistre, poinct ne me blasmez.
Voyez les enfants en ce jeu ;
Ilz sont rouges & enflammez
Comme ceulx qui sont près du feu.
Ou ilz n’ont nul froict en ce lieu
Comme celluy que vous sentez,
Ou ilz sont mieulx gardez de Dieu
Que vous, que tant vous tourmentez.
L’Inquisiteur, le frappant.
Quel fol voicy ? Te tairas tu ?
Tappartient il d’ainsi parler ?
Le Varlet.
Mon Maistre, vous n’avez battu ;
A Dieu donq ; je m’en veulx aller.
L’Inquisiteur.
Non feras, car trop bien celler
Tu sçaiz mon affaire secret.
