S’il garesist, ceo li pesast,
Et bel li fust se il néiast :
Quant il eut bien aséuré,
El hafne sunt ensemble alé :
La barge trevent, enz l’unt mis,
Od lui s’en vet en sun païs.
La nés s’en va, pas ne demure,
Li Chevaliers suspire è plure,
La Dame regretout sovent,
Et prie Deu omnipotent,
Qu’il li dunast hastive mort,
Et que jamès ne vienge à port,
S’il ne repeot aver s’amie
K’il désirast plus que sa vie.[1]
Tant l’ad cele dolur tenue,
Ke la neif est à port venue,
U ele fu primes trovée ;
Assez ert près de sa cuntrée,
Au plustost k’il pout s’en issi,
Un Damisel qu’il ot nurri,
Errot après un Chevalier,
En sa main tint un destrier ;
Il le counut, si l’apelat,
E li Vallez le reguardat.
Sun Seignur veit, à pié descent,
Le cheval li met en présent :
Od li s’en veit, grant joie en funt
Tut si ami kant trové l’unt ;
- ↑ Manuscrit, no 7989 ²
Se il ne puet r’avoir s’amie
U s’espérance est et sa vie.
