Qui bien en veut dire le voir,
Jà n’i déust repuns avoir,
Se pur çou nun que sun Seignur,
Doit-hum faire par-tut honur,
Un sairement l’enwagera,
E li Rois le nus pardonra ;
E s’il poet aveir sun garant,
E s’Amie venist avant,
E ce fu veirs que il en dist,
Dunt la Roïne ne se marist,
De ce aura-il bien merci,
Quant pur vilté nel’ dist de li,
E s’il ne poeut garant aveir,
Ce li devuns faire saveir,
Tut sun service part del’ Rei,
E si le cungie de sei.
Al Chevalier unt envoié,
E se li unt dit è pruvé,
Que s’Amie face venir,
Pur lui tenser è garantir.
Il leur a dit qu’il ne purreit
Ne jà par li secure n’areit ;
Cil s’enturnent as jugéors
Ki n’atendeient nul secors,
Li Rois les hasteit durement,
Pur la Roïne qui s’atent.
Quant il deveient départir,
Deus Puceles virent venir,
Page:Marie de France - Poésies, éd. Roquefort, I, 1820.djvu/252
Cette page a été validée par deux contributeurs.
236
LAI DE LANVAL.
