La Vielle dist : or soufferrez
Mes Sires est el bois alez,
Nus ne vendra çaiens fors moi ;
Mult est la Dame en grand effroi.
Semblant fist qu’ele se pasma,
Cele la vit, mut s’esmaïa,
L’uis de la chambre a deffermé,
Si a le Prestre demandé ;
E cil i vint plus tost qu’il pot,
CORPUS DOMINI aportot.
Li Chevaliers l’a récéu
Le vin du calice a béu :
Li Chapelain s’en est alez,
E la Vielle a les huis fermez.
La Dame gist lez sun ami,
Ains mes si biau couple ne vi ;
Quant unt assez ris è joé,
E de leur priveté cunté,
Li Chevaliers cungié a pris,
R’aler s’en vet en sun païs.
Elle le prie ducement
Que il la revoie suvent.
Dame, fet-il, quant vus plera
Jà heure ne trespassera ;
Mès tel mesure en esgardez,
Que nul de nus seit encumbrez :
Ceste Vielle nus traïra,
E nuit è jur nus guetera ;
Page:Marie de France - Poésies, éd. Roquefort, I, 1820.djvu/302
Cette page a été validée par deux contributeurs.
286
LAI D’YWENEC.
![](http://upload.wikimedia.org/wikipedia/commons/thumb/7/7c/Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu/page302-1024px-Marie_de_France_-_Po%C3%A9sies%2C_%C3%A9d._Roquefort%2C_I%2C_1820.djvu.jpg)