Ayant sailli hastivement,
Par le pan del’ hauberc le prent,
E Deu, fait-il, cum sui gariz,
Par fei, amis, tu es mi Fiz,
Pur tei trover è pur tei quere,
Eissi vins-jeo fors de ma tere.
Quant cil l’oï à pié descent,
Sun Peire baisa ducement,
Bel semblant entre eus feseient,
E iteus paroles diseient
Que li autres kes’ esgardouent,
De joie è de pité plurouent.
Quant li turnéiemenz départ,
Milun s’en vet mut li est tart,
Qu’à sun Fiz parlot à leisir,
E qu’il li die sun pleisir :
En un ostel furent la nuit,
Asez eurent joie è déduit,
Les Chevalers eurent plenté.
Milun ad à sun Fiz cunté
De sa Mère, cum il l’ama,
E cum sis Pères l’a duna
A un Barun de sa cuntrée,
E cument il l’ad puis amée
E ele lui de bun curage
E cum del’ Cigne fist message.
Ses lettres lui feiseit porter,
Ne s’osot en nullui fier.
Page:Marie de France - Poésies, éd. Roquefort, I, 1820.djvu/378
Cette page a été validée par deux contributeurs.
362
LAI DE MILUN.
