Page:Marie de France - Poésies, éd. Roquefort, I, 1820.djvu/432

La bibliothèque libre.
Cette page a été validée par deux contributeurs.
416
LAI D’ELIDUC.

E tant des autres Chevaliers,
Tut en chargent lur esquiers.220
Vint è cinc furent cil de ça,
Trente en pristrent de ceus de là
Del’ harneis pristrent à grant espleit,
E merveillus gain i unt feit ;
Arière s’en vunt tut lié
Mut aveïent bien espleité.
Li Reis esteit sur une tour,
De ses hummes ad grant poour
D’Eliduc forment se pleigneit,
Kar il quidout è si crémeit230
Qu’il ert mis en abandun,
Ses chevaliers par trahisun.
Cil s’en vienent tut aruté
E tut chargié, è tut trussé,
Mut furent plus al revenir,
Qu’il n’estéïent al fors eissir.
Par ceo les descunut li Reis
Si fu en dute è en suspeis ;
Les portes cumande à fermer,
E les genz sur les murs munter,240
Pur traire à eus è pur lancier,
Mès n’en aurunt-il nul mestier.
Cil eurent envéié avant,
Un Esquier esperunant,
Qui l’aventure lur mustra,
E del’ Soudéeur li cunta :