Par un suen chamberlenc privé
L’ad resquis, prié è mandé
Qu’à li venist esbainier,
E parler, è bien acunter ;
Mut durement s’esmerveillot
Que il à li ne repeirot.
Eliduc respunt qu’il irrat,
Volenters si acunterat :
Il est munté sur sun destrier,
Od li mena un Chevalier,
A la Pucele veit parler,
Quant en la chambre deust entrer,
Le Chamberlenc enveit avant,
Cil s’alat aukes en targant,
Deci que cil revient arière,
Od duz semblant od simple chière,
Od mut noble acuntement,
Si parla mut afeitement,
E merciat la Dameisele,
Guilliardun qui mut fut bele,
De ceo que li plot à mander,
Que il venist à li parler.
Cele l’aveit par la mein pris,
Desur un lit èrent asis ;
De plusurs choses unt parlé,
Icele l’ad mut esgardé
Sun vis, sun cors, è sun semblant :
Dit en lui n’ad mès-avenant,
Page:Marie de France - Poésies, éd. Roquefort, I, 1820.djvu/436
Apparence
Cette page a été validée par deux contributeurs.
420
LAI D’ELIDUC.