Mut en fu lée la Pucele ;
Dresciée s’est, celui apele,
Luinz des autres se sunt assis,
Amdui èrent d’amur espris.
El nel’ osot areisuner,
E il dute à li parler,
Fors tant ke il la mercia
Del’ présent qu’el li envéia.
Unc mès n’ot avéir si chier ;
Ele respunt al Chevalier :
Que de ceo li esteit mut bel
Pur ceo li envéat l’anel,
E la ceinture autresi,
Que de sun cors l’aveit seisi,
Ele l’amat de tel amur,
De lui volt faire sun Seignur.
Si ele ne peot lui aveir,
Une chose sace de veir,
James n’auera hume vivant,
Ne li redie sun talant.
Dame, fet-il, grant gré vus sai,
De vostre amur grant joie en ai,
Quant vus tant me avez prisié,
Durement en dei estre lié ;
Me remeindrat pas en dreis mei,
Un an sui remis od le Rei,
La fiance ad de mei prise,
N’en partirai en nule guise
Page:Marie de France - Poésies, éd. Roquefort, I, 1820.djvu/452
Cette page a été validée par deux contributeurs.
436
LAI D’ELIDUC.
