Car jeo sui saudoiers le Roi,
Loiauté li pramis è foi,
E de sa vie è de s’anor,
Quant à lui remés l’autre jor
Jà par moi hunte n’i ara :
Dunt prist cungié, si s’en ala.
La Roïne l’en vit aler,
Si cummença à suspirer,
Dolante est mult, ne sait que faire,
Ne s’en voleit par tant retraire ;
Suventes feiz le requereit,
Ses mésages li trameteit,
Riches présens li envoieit,
E il trestus les refuseit.
La Roïne mult l’en haï
Quant ele à lui del’ tut failli,
A sun Seignur mal le meteit,
E volentiers en mesdiseit.
Tant cum li Rois maintint la guerre,
Remest Graelent en la terre ;
Tant despendi qu’il n’ot que prendre,
Car li Rois le faiseit atendre,
Ki li deteneit ses saudées.
Ne l’en aveit nules dunnées,
La Roïne li desturneit,
Au Roi diseit è cunseilleit
Ke nule rien ne li donast
Fors le cunroi qu’il n’en alast :
