Povre le tenist entur lui,
Qu’il ne péust servir autrui.
Que fera ore Graelens ?
N’est merveille s’il est dolens ;
Ne li remest que engagier,
Fors un runcin n’est gaires chier :
Il ne puet de la vile aler
Car il n’aveit sor quoi munter.
Graelens n’atent nul securs ;
Ce fu en mai en des luns jurs,
Ses Hostes fu matin levés,
Od sa Femme est el burc alés
Chiés un de ses veisins mengier.
Tut seul laisça le Chevalier,
Od li n’en eut en la maisun
Escuier, sergant, ne garçun,
Fors seul la File à la Burgeise,
Une Mescine mult curteise.
Quant vint à l’eure du disner,
Au Chevalier ala parler,
Mult li pria qu’il se hastast,
E qu’il ensanble od li mengast.
Il ne se puet pas rehaitier,
Si apela sun escuiier,
Dist li k’amaint sun cacéor,
Sa sele mete et tot l’ator ;
Là hors irai esbanoier,
Car jeo n’ai cure de mangier.
