Tant qu’en une lande l’en maine,
Devers le sors d’une fontaine,
Dunt l’iave esteit è clère è bele.
Dedens baigneit une Pucele,
Dex Dameiseles la serveient :
Sor l’eur de la fontaine esteient.
Li drap dunt ele ert despoulie,
Erent dedens une foillie.
Graelens a celi véue
Qui en la fontaine esteit nue.
De la Bisse n’eut-il puis cure,
Cele part va grant aléure.
Tant la vit graisle è escanie,
Blanche è gente è colorie ;
Les ex rians è bel le frunt,
Il n’a si bel en tut le munt :
Ne la veut en l’iave tuchier,
Par loisir la laisse baignier.
Sa despoulle est alés saisir,
Par tant le cuide retenir
Ses Dameiseles s’aperçurent
Del’ Chevalier, en effroi furent.
Lor Dame l’a araisuné,
Par mautalent l’a apelé :
Graelent, lai mes dras ester,
Ne t’en pués gaires amender,
Se tu od toi les emporteies,
E ensi nue me laisseies ;