Trop sanleroit grant cunveitise.
Rent moi se viax nun ma chemise,
Li mantiax puet bien estre tuens,
Denier en prens, car il est buens.
Graelent respunt en riant,
Ne sui pas fix à marchéant,
N’a Borgois pur vendre mantiax :
S’il valoit ore trois castiax,
Si n’enporteroie-jeo mie :
Isciés de cele iave, Amie,
Prenés vos dras, si vus vestés
Ançois que vus à mei parlés.
Je n’en voil pas, dist-ele, iscir,
Que de mei vus puisiés saisir ;
N’ai cure de vostre parole,
Ne sui nient de vostre escole.
Il li respunt, je sofferai,
Vostre despoulle garderai,
Desque vus isterés ça fors :
Bele, mut avés gent le cors.
Qant ele voit qu’il veut atendre,
E que ses dras ne li veut rendre ;
Séurté demande de lui
K’il ne li face nul anui.
Graelent l’a aséuré ;
Sa chemise li a dunée :
Cele s’en ist de maintenant,
Il li tint le mantel devant,