Deniers li baille ad grant plenté,
Si li a dit è cumandé
Que ses Sires ert aquités,
E ses hostez bien acuntés :
Gart qu’assés i ait à mangier,
E s’en la vile a Chevalier
Qui séjorner voille tut coi,
Q’il l’en amaint ensanle od soi.
Li Hostes fu prex è curteis,
E mult vaillant cumme Burgeis :
Riche cunroi fist aturner,
Par la vile fet demander
Les Chevaliers mesaaisiés,
E les prisuns è les croisiés ;
A l’ostel Graelent les maine,
Del’ honerer forment se paine,
Assés i eut joué la nuit
D’estrumens è d’autre déduit.
Le jur fu Graelent haitiés,
E ricement apareilliés.
Grans duns duna as harpéors
As prisuns è as guoors ;
N’aveit berguis en la cité
Qui li éust aveir presté,
Qui ne li doinst é face honur,
Tant qu’il le tienent à Seignur.
Desor est Graelent à aise,
Ne voit mès rien qui li déplaise ;
