En la Cort vienent dex Puceles,
Al Roiame n’aveit plus beles ;
Al Chevalier mult aiderunt
Si Diu plaist, sel’ délivrerunt.
Cil unt vulentiers atendu,
Ains que d’iloeuc soient méu,
Sunt les Dameiseles venues
De grant biauté è bien vestues :
Bien sunt en deus bliaus lacies,
Graisles furment è bien delgies[1].
De lur palefreis descendirent,
A dex Varlés tenir les firent :
En la sale vindrent au Rei.
Sire, dist l’une, entent à mei,
Ma Dameiselle nus cumande,
E par nus dex vus pri et mande
C’un poi faites sufrir cest plait,
E qu’il n’i ait jugement fait ;
Ele vient ci à toi parler
Pur le Chevalier délivrer.
Ains que cele éust dist son cunte
Eut la Roïne mut grant hunte ;
Ne demoura gaires après,
Devant le Rei en son palès
Vinrent dex autres mult plus gentes,
De colur blanches è roventes[2],
Page:Marie de France - Poésies, éd. Roquefort, I, 1820.djvu/544
Cette page a été validée par deux contributeurs.
528
LAI DE GRAELENT
