Cette page a été validée par deux contributeurs.
LAI DE GUGEMER.
Volentiers devreit-hum oïr
Cose k’est bonne à retenir ;
Ki de boine matère traite
Mult me peise se bien n’est faite :
Oiez, Segnurs, ke dit Marie
Ki en sun tens pas ne s’ublie[1].
Ce lui deivent la gent loer,
Ki en bien fait de sei parler ;
Mais quant oent en un païs,
Humme u femme de grant pris,
Cil ki de sun bien unt envie,
Suvent en dient vileinie ;
Sun pris li volent abeisier,
Par çeo coumencent le mestier.
Del’ malveis chien, coart, félun,
Ki mort la gent par traisun
Nel’ voil mie pur çeo laissier.
Si jangleur u si losengier
Le me volent à mal turner
Çeo est lur dreit de mesparler.
- ↑ On voit, par le préambule de ce Lai, combien Marie
étoit tourmentée par la crainte de ne pas réussir dans les
ouvrages qu’elle publioit.