Cette page n’a pas encore été corrigée
Chanson XXVIII
J'ay grand desir
D'avoir plaisir
D'amour mondaine:
Mais c'est grand peine,
Car chascun loyal amoureux
Au temps present est malheureux:
Et le plus fin
Gaigne à la fin
La grâce pleine.
Chanson XXIX
O Cruaulté logée en grand beaulté,
O grand beaulté, qui loges cruaulté,
Quand ma douleur jamais ne sentiras,
Au moins ung jour pense en ma loyaulté:
Ingrate alors (peult estre) te diras.
Chanson XXX
J'ayme le cueur de m'Amye,
Sa bonté, et sa doulceur.
Je l'ayme sans infamie,
Et comme ung Frere la Soeur.
Amytié desmesurée,
N'est jamais bien asseurée,
Et mect les cueurs en tourment:
Je veulx aymer aultrement.
Ma Mignonne debonnaire,
Ceulx, qui font tant de clamours,
Ne taschent qu'à eulx complaire
Plus, qu'à leurs belles amours.
