Laissons les en leur follye,
Et en leur melancolye:
Leur amytié cessera,
Sans fin la nostre sera.
Chanson XXXI
Si je vy en peine, et langueur,
De bon gré je le porte,
Puis que celle, qui a mon cueur,
Languist de mesme sorte.
Tous ces maulx nous faict recepvoir
Envie decevante,
Qui ne permect nous entreveoir,
Et d'en parler se vante.
Aussi Danger faulx Blasonneur
Tient Rigueur à la Belle,
Car il menasse son honneur,
S'il me veoit aupres d'elle.
Mais plus tost loing je me tiendray,
Qu'il en vienne nuysance:
Et à son honneur entendray,
Plus tost qu'à ma plaisance.
Chanson XXXII
Changeons propos, c'est trop chanté d'amours:
Ce sont clamours, chantons de la Serpette:
Tous Vignerons ont à elle recours,
C'est leur secours pour tailler la Vignette.
O Serpillette, ô la Serpillonnette,
La Vignolette est par toy mise sus,
Dont les bons Vins tous les ans sont yssus.