Pour la Blanche
Pourtant si le Blanc s'efface,
Il n'est pas à despriser:
Comme luy le Noyr se passe,
Il a beau temporiser.
Je ne veulx point me priser,
Ne mesdire en ma revanche:
Mais j'ayme mieulx estre blanche
Vingt, ou trente ans ensuivant
En beauté nayve, et franche,
Que noire tout mon vivant.
Chanson XXXVIII
J'ay trouvé moien, et loisir
D'envoyer Monsieur à la chasse,
Mais ung aultre prend le plaisir
Qu'envers ma Dame je pourchasse.
Ainsi pour vous gros Boeufz puissans,
Ne trainez Charrue en la Plaine:
Ainsi pour vous Moutons paissans,
Ne portez sur le dos la Laine.
Ainsi pour vous Oyseaulx du Ciel,
Ne sçauriez faire une couvée:
Ainsi pour vous Mousches à miel,
Vous n'avez la Cire trouvée.
Chanson XXXIX
Si j'avoys tel credit,
Et d'Amour recompense,
Comme l'Envieux pense,
Et comme il vous a dict,
