guer, elles ont esté apointées a mettre par devers la court et, au conseil.
Si a la court veu ledict procès a grant et meure deliberation, avec tout ce qu’il failloit veoir en ceste matiére.
Et, tout veu, la court dit que, nonostant chose proposée par lesdictz religieux cordeliers de l’observance, ledit amoureux nouvellement rendu cordelier viendra, en la court de ceans, renoncer aux promesses et aliances d’amours par luy faictes avec ladite dame, pour sa descharge, et en aura lectre ou acte, se bon luy semble.
Et si ordonne la court que lesdis cordeliers seront contrains, par la presence de leurs personnes et ouverture de leurs portes, a faire exhibicion dudit cordelier et le amener en jugement ; pourveu toutes voyes que bon leur semble, ilz luy porroyent mettre ung bandeau devant les yeulx, affin qu’en parlant ou renonçant audictes promesses et aliances, il ne puisse veoir la demanderesse, jadis sa dame.
Et, au surplus, sont compensés les despens d’ung costé et d’aultre, et pour la cause.
