dit ce que cy dessus est contenu, (fol. vc xx) elle le semondy et requist qu’il voulsist retourner a Paris, la ou il sçauroit estre le roy, disant que quaresme estoit et bon temps, et que tout homme se devoit amender contre le jour de Pasques quy approuchoit, ayant fiance en la royne sa suer, laquelle pourchaceroit sa paix comme elle l’avoit en une nuit songié. Et, fin de compte, elle fist tant par ses parlers que le duc son seigneur s’i accorda. Lors ilz partirent d’illec et enquirent ou le roy se tenoit, et l’en leur dist qu’il aloit faire ses Pasques a Orléans. Si cheminerent tant qu’ilz viendrent en la cité tout ainsi mal habilliés povrement, comme vous le povez penser que si estoient ilz[1]...
102. — Comment la royne de France fist rendre et delivrer au duc Gerard Roncillon et ses autres places sans le sceu du roy.
L’anchienne histoire racompte que quant le duc Gerard et la duchesse Berthe sa femme eurent estez au roy Charles Martel presentez par la royne, quy l’ottroy avoit et le don de la paix du duc Gerard et de Berthe sa suer[2], et le roy eust regardé le roy[3] par despit et respondu a la royne qu’elle l’avoit trahy en la presence des barons quy la estoient, il[4] fu tant esbahy que merveilles, et non sans cause quant il le vist partir du prael sans avoir de luy nulle bonne response. Et dist a la royne qu’il vouldroit estre (fol. vc xxvij) dont il estoit venu, puis que autrement ne se povoit avecques le roy appointier. Et luy requist qu’elle luy feist ses meschans habis rapporter et qu’elle le feist secretement conduire en la cité, voire par ainsi que sa femme Berthe luy demourast, et qu’il s’en alast tout seul a son aventure. Si devez sçavoir que grant fut le dueil que la duchesse demena quant elle ouy ainsi parler son seigneur, et respondi
