Que moult plourent a tote gent,
Por lur bealté, por lor proecce,
Por lor sens, por lor gentilesce,
E que tant estei[e]nt apert ; (f. 1 c)
Li uns en out non Gillebert,
L’autre Guatier le Mareschal.
De grant bialté érent égal.
Tant amendèrent e tant crurent
Ensemble que chevalier furent.
Mult eurent buen commencement
Se il durassent longement,
E molt menoient bele vie.
Mais morz qui des boens a envie
Ne pout suffrir ne endurer
K’il deüssent longes durer.
Issi avint con ge vos di :
Li uns des deus amaladi
A Salebires, ç’oï dire :
Unkes mestier n’i orent mire
Ne unkes riens n’i pout valeir,
Sens ne proece ne aveir,
Ne rien de mort nel sucurut.
Grant doel eurent quant il murut
Si vaslet, e tant en plorérent
A poi de duel ne s’afolérent ;
Molt fu li d[u]elz granz e espès.
Li autres jo[o]ut as esches ;
Un vaslet vit vers lui venant,
82 chevaliers. — 88 l. endurer. — 94 aveir, corr. saveir ? — 95 rein … sucurust. — 97 vasleit. — 99 grant.