Je seroie coars renois,
Se mon oncle honir lessoie. »
A tant vers le prestre s’avoie,
Qui moult estoit lais et hideus ;
Et cil, qui n’ert pas péureus
Nient plus que s’il ert toz de fer,
Li dist : « De par toz ceus d’Enfer
Soiez-vous ore revenuz ;
Bien estes en Enfer connuz
Quant il vous ont ci raporté. »
A tant a le prestre acosté,
Si l’en porte, à tout lui s’en cort
Parmi le sentier de la cort ;
Ne le veut mie metre el sac.
Estormis sovent en somac
Le regarde, si le ramposne :
« Restriez[1] ore por la dosne
Revenuz si novelement ?
Jà por nul espoentement
Ne lerai que ne vous enfueche. »
A tant de la haie s’aprueche,
Celui qu’il portoit i apuie ;
Sovent garde qu’il ne s’en fuie.
La fosse a fète molt parfonde.
Le prestre prent, dedenz l’afonde,
Si lons comme il estoit le couche,
Puis li a les iex et la bouche
Et le cors tout couvert de terre ;
Puis jure les sainz d’Engleterre,
Ceus de France et ceus de Bretaingne,
- ↑ 211, 17, R’estuez, lisez Restriez.
