Se li prestres revient huimès.
Mès de cestui est-il bien pès,
Que il ne porra revenir.
Mès du tiers soit au couvenir[1],
Que il trovera jà tout prest ;
Mestier li est qu’il se r’aprest,
Quar on li jue de bondie.
Or est résons[2] que je vous die
De Jehans, qui mist, c’est la voire
El lieu du daarain provoire
Où li autre dui furent pris,
Qui jà erent fors du porpris
Enfoui par lor grant mesfet[3].
Et, tantost qu’Estormis ot fet,
A son ostel est repériez.
« Hé ! la ! com je sui traveilliez,
Fet Estormis, et eschaufez !
Moult estoit cras et esfossez
Li prestres que j’ai enfoui ;
Moult longuement i ai foui
Por lui metre plus en parfont ;
Se déable ne le refont
Revenir, jà ne revendra. »
Et Jehans dist jà ne verra
L’eure qu’il en soit delivrez :
« J’en serai à honte livrez
Ainz demain à l’avesprement. »
Estormis li respont : « Comment
Serez-vous livrez à tel honte. ?
Page:Montaiglon - Recueil général et complet des fabliaux des 13e et 14e siècles, tome I.djvu/240
Le texte de cette page a été corrigé et est conforme au fac-similé.
212
410
fabliau xix