Foi que doi vous, bien a deux anz
Qu’Alous me tient en tel destrèce,
Qu’aine puis n’oï joie ne léèce,
Et si est tout par jalousie ;
Si en haz moult, sachiez, sa vie,
Quar mainte honte m’en a fète.
Fols est qui fame espie et guète.
Dès or mès porra dire Alous,
Si dira voir, que il est cous.
Dès or vueil estre vostre amie.
Quant la lune sera couchie,
Adonc venez sans demorée,
Et je vous serai aprestée
De vous reçoivre et aaisier.
— Dame, ce fet à mercier,
Fet li prestres, vostre merci ;
Departons-nous hui mes de ci,
Que n’i sorviengne[1] dans Alous ;
Penssez de moi et je de vous. »
A tant s’en partent enes l’eure ;
Chascuns s’en va, plus n’i demeure ;
Cele revint à son mari,
Qui moult avoit le cuer mari.
« Dame, fet-il, d’ont venez-vous ?
— Sire, fet-el, de là desous,
Dist la dame, de cel vergié.
— Conment, fet-il, sanz mon congié ?
Poi me doutez, ce m’est avis. »
Et la dame se test toz diz,
Que de respondre n’avoit cure.
- ↑ 129 — sorvengne, lisez sorviengne.