Et Alous se maudist et jure,
S’une autre foiz li avenoit,
Honte et ledure li feroit.
Atant remest, s’est saillis sus,
Trestoz penssis et irascus ;
Moult se doute de puterie ;
Bien le demaine jalousie,
Qui de lui fet tout son voloir.
Çà et là vait par son manoir
Savoir s’il i avoit nului
A cui sa fame éust mis lieu,
Tant qu’il s’en entre en .I. jardin.
Douz tens fesoit et cler matin,
Et garde et voit que la rousée
I estoit auques defoulée
De lieu en lieu par le vergié ;
S’en a son cuer forment irié.
Avant en vait en une place,
Iluec endroit li piez li glace,
Que sa fame fu rafetie,
Por son pié qui ainsi li glie ;
Il esgarde tout environ,
Et vit le leu où li talon
Erent hurté et li orteil.
Or est Alous en mal trepeil,
Quar il set bien tout à fiance,
Et li leus li fet demoustrance
Que sa fame a esté en œvre.
Ne set conment il se descuevre,
Quar n’en veut fère renommée,
Page:Montaiglon - Recueil général et complet des fabliaux des 13e et 14e siècles, tome I.djvu/288
Le texte de cette page a été corrigé et est conforme au fac-similé.
260
142
fabliau xxiv
