Ne ja fust se maisons vendue.
.I. jor fu la dame venue
Messe oïr à une abeïe,
Querre secors Diu et aïe,
Et je vous di, ce n’est pas gile,
Qu’entre l’abeïe[1] et la vile
Couroit une aige non pas large
Ki ne portoit ne nef ne barge.
De çou plus conte ne vous quier :
La dame se siet au moustier ;
En .I. des angles se fu misse
Con cele qui fu bien aprise ;
A jointes mains, à eus plourous,
Fu devant le crois à genous,
Et tint .I. sautier en sa main.
Atant es vous le secretain :
La dame prist à regarder.
Quant il le vit ensi plourer,
Si va vers li tout belement :
« Cil Dius qu fist le firmament
Vous doinst bon jor, ma douce dame !
Mout vauroie savoir par m’ame
Porquoi vous plorrés issi fort.
— A ! sire, jou n’en ai pas tort.
Se jou pleure, j’ai mout bien droit :
J’ai un mari ki despendroit
.I. roiame s’il estoit siens ;
Tant a fait que nous n’avons riens. »
Li secretains la vit mout bele ;
Au cuer li point une estincele
- ↑ Vers 26. — * abeïe ; ms., abie.
